Junior: BCA 96 45 - 50 C.B. Arteixo

Partido correspondente á primeira xornada do Grupo A-3 da 2ª división junior masculino, disputado o domingo ás 12:00 horas na Polideportiva de Riazor II de A Coruna.

45 - 50  (15-22 / 11-11 / 11-9 / 8-8)

Comezaba o partido cun gran acerto de cara ó aro por parte de ámbolos dous equipos. Os locais apoiados no acerto de Fraga e os arteixáns no rebote ofensivo e nos 1x1 de Fabián. Mediado o periodo, os arteixáns aumentaron o nivel no rebote defensivo e ofensivo, chegando con vantaxe ó remate do periodo (15-22)

No segundo periodo descendeu o nivel de acerto e aumentaron as imprecisións no xogo, facendo que os guarismos anotadores fosen menores. Aínda así, os de Arteixo continuaban a dominar o rebote no seu aro, evitando que os locais se achegasen no marcador. Chegouse ó descanso con 7 puntos de vantaxe para os de Arteixo (26-33)

Á volta do descanso, os arteixáns saíron con menos intensidade, o que aproveitaron os locais para achegarse no marcador, pero sen conseguir poñerse por diante. Un tempo morto para aclarar ideas no ataque e non perder tantos balóns, volveu a distanciar ós arteixáns para encarar o último periodo con 5 puntos de vantaxe (37-42)

No último periodo, o partido igualouse por completo ata que os locais chegaron a colocarse 43-44, pero un tiro libre de Darío e unha tripla de Miguel a falta de 2 minutos puxeron cinco puntos de vantaxe para os arteixáns que xa foron insalvables para os locais.

Destacar o nivel de entrega e de intensidade de tódolos xogadores e o xogo en equipo no ataque para buscar as mellores opcións en cada momento, sobre todo no ataque contra a zona.

Por parte de BCA 96 xogaron Albo (6), Hernández (0), Pardo (0), Rancaño (12), Bermelio (1), Fraga (14), López (-), Gambhir (2), Rampa (2), Pedreira (6) e Eiroa (2)

Adestrador: Nacho Pena

Por parte do C.B. Arteixo xogaron Darío (7), Natahel (0), Juanlu (2), Miguel (12), Leo (0), Iván (6), Eloy (6), Diego Pérez (8) e Fabián (9)

Adestrador: Germán Lozano

A vindeira fin de semana o C.B. Arteixo contará con xornada de descanso, reanudando a competición previsiblemente o domingo 9 de mazo ás 19:00 horas contra o Ferrol C.B. no Pavillón de Esteiro de Ferrol.