Primeiro test do equipo senior de 4ª división: C.B. Laracha 58 - 38 C.B. Arteixo

Primeiro partido de pretempada para o equipo de Germán Lozano disputado o domingo ás 17:00 horas no IES Agra de Leborís de A Laracha.

Comezaba o partido con erros no lanzamento en ámbolos dous equipos e as defensas impoñíanse ós ataques. Os arteixáns eran capaces de controlar o rebote defensivo, non concedendo segundas oportunidades a un equipo fisicamente superior. No ataque o balón circulaba ata boas posicións, pero non estaban acertados. Chegouse ó final do primeiro periodo cun 11-10 no marcador.

O segundo periodo foi desastroso por parte dos arteixáns: numerosas perdas de balón, nulos no rebote defensivo, pouca intensidade na defensa do 1x1 e negados de cara ó aro. Con estes argumentos, foi moi sinxelo para os locais despegarse no marcador e anotar con facilidade nos seus ataques. Chegouse ó descanso cun 32 - 16.

Á volta do descanso mellorou a actitude e o xogo con respecto do segundo periodo. A intensidade defensiva foi boa e no ataque o balón circulaba polos dous lados do ataque. Seguíase sen anotar con frecuencia, pero os locais tampouco estaban acertados no ataque. O parcial deste periodo foi de 9-8, deixando o marcador nun 41-24.

O último periodo foi similar ó terceiro en canto ó xogo, pero con ámbolos dous equipos máis acertados de cara ó aro. Finalizando o partido cun 58 - 38 a favor dos xogadores de Alberto García.

Hai que seguir mellorando nos adestramentos e sobre todo non desconectar en canto se producen erros consecutivos, xa que 5 ou 10 minutos de baixada de intensidade provocan diferenzas imposibles de poder remontar e un mal sabor de boca ó finalizar o partido.