Senior 4ª división: Termiset Irmandiños 71-39 C.B. Arteixo

Partido xogado o sábado ás 20:00 horas no CEIP Esteiro de Ferrol entre o Termiset Irmandiños e o C.B. Arteixo, correspondente á volta dos 1/4 de final da Copa Primavera senior masculino. Partían os ferroláns con 37 puntos de vantaxe do partido de ida.

Comezaba o partido ben para os arteixáns, cun inicio moi acertado e conseguindo as primeiras vantaxes no marcador. A partir do 3-9 no marcador, os locais anotaron dúas triplas consecutivas, mentres que os arteixáns menguaban o seu acerto. Unha falta sobre unha tripla lanzada no último segundo deu a máxima vantaxe ós locais, 17-10, ó rematar o periodo.

No segundo periodo, os arteixáns seguían a realizar un bo xogo de ataque, pero na defensa non conseguían axustar ben ante o movemento de balón local. Aumentaba a diferenza a favor dos locais, pero non deixaban os arteixáns que se fosen moito no marcador. Ó descanso o electrónico sinalaba un 34-23.

Á volta do descanso,  os arteixáns conseguiron achegarse ata os 4 puntos de desvantaxe, pero o acerto dos locais dende a liña de 6,75, fixo que se estirase a diferenza ata case os 20 puntos ó remate do periodo, que finalizou 54-35.

O último periodo, igual que no partido de ida, foi un castigo para os arteixáns, nulos de cara ó aro e perdendo moitos balóns ante a presión local. A vantaxe foise por riba dos 30 puntos sen que o traballo dos arteixáns poidese reducila. Rematou o partido cun 71-39 no marcador.

Con esta derrota, finaliza a tempada para o C.B. Arteixo. Hai moitas lecturas positivas desta tempada, sobre todo en canto ó nivel de traballo e compromiso de todo o equipo.

C.B. Irmandiños

Alvariño (10), Constenla (0),Franco (0), Juan (7), Suárez (16), Corral (17), Permuy (10), Aboal (1), D Ruibal (4), S Ruibal (6)

Ad: Javier Uría

C.B. Arteixo

Edu (2), Juan (5), Manu (16), Fabián (4), Pavo (0), Víctor (6), Arkaitz (4), Dylan (2), Adrián (0), Pablo (0)

Ad: Germán Lozano